وجه إبراهيم حسن، مدير منتخب مصر الأول لكرة القدم، عدة رسائل نارية تحدث خلالها عن ما مر به شقيقه حسام حسن، المدير الفني للفراعنة خلال الفترة الماضية.
وكشف إبراهيم حسن، عن تعرض حسام حسن لوعكة صحية خطيرة خلال الفترة التي سبقت السفر إلى نهائيات كأس العالم، موضحًا أن شقيقه كاد أن يفارق الحياة من شدة خطورة ما مر بها.
إبراهيم حسن ورسائل عن منتخب مصر
نشر إبراهيم حسن، مدير منتخب مصر، عبر حسابه الشخصي على موقع التواصل الاجتماعي "فيسبوك" عدة منشورات، وجه خلالها عدة رسائل عن تجربته رفقة شقيقه حسام مع الفراعنة.
وجاء نص ما ذكره إبراهيم حسن خلال منشوراته على النحو التالي:
"اتقوا الله في مصر ليه عاوزين تكسروا فرحة الناس الطيبة والأطفال اللي رجعوا يحفظوا تيشيرت وشعار منتخبهم وألوان علم مصر، أسألوا المصريين المغتربين عن أطفالهم اللي كانوا قربوا ينسوا ألوان وشكل علم بلدهم افتكروا لمة الشعب وفرحتهم أثناء وبعد كل مباراة، افتكروا احترام العالم كله لمنتخب مصر".
"افتكروا حسام حسن المخلص والمحب لبلده اللي بينتحر علشان يفرح بلده من منا بلا أخطاء ولا ابتلاء في حياته؟.. ورغم كل ظروفه الخاصة لديه عمله واسم بلده وبيفصل وبيرمي كل حاجة ورا ضهره ليه بنتحارب بالشكل ده عند كل موقف ليه قبل كل معسكر بيتعلن علينا الحرب الشرسة دي؟".
"ليه الغل من زمايل لينا كنا بناكل في طبق واحد وكنا حاملين شعار واحد وهو علم مصر، ليه الغل من معظم الإعلاميين والحرب والهجوم غير المبرر في كل صغيرة وكبيرة والتقليل من أي نجاح بنعمله، ليه بنكبر الصغير على الكبير وبننسى الأصول اللي الشعب المصري متربي عليها".
"نصيحة ورسالة للزملاء اللي نفسهم يبقوا في مكانه، نجاحنا أنا وحسام هو اللي هيديك الفرصة بعد كده تبقى موجود مكانه علشان اللي بياخد القرار يبقى مطمن من تجربتنا ويديك فرصتك وميخافش وننسى الأجنبي لكن أنا لو فشلت مش هتجيلك".
"معلومة مكنتش عاوز أقولها.. هل تعلم أن حسام أصيب أكثر من مرة أثناء المعسكرات والمباريات والتصفيات بذبحة واتلحق بالصدمات في آخر لحظة وبعدها بفترة صغيرة عمل دعامات وبعدها بشهر دخل غرفة العمليات تاني وقالوا ساعة علشان يضحكوا عليا".
"فضلت منتظره يطلع من غرفة العمليات وقعدوا يقولوا أي حاجة علشان متخضش والحمد لله طلع وبرضه مقدرش ايه سبب المدة دي كلها، بعدها بأيام روحت المستشفى أعمل تحاليل عادية قابلت الدكتور بالصدفة اللي عمل العملية قالي كنت مخبي عليك سبب التأخير إن حسام بنسبة كبيرة مكانش هيطلع من غرفة العمليات عايش".
"وده لأن العملية كانت في شرايين القلب وكانت معقدة جدا ومن المواقف مباراة البرازيل.. بعد العملية مكانش قادر يمشي ولا يقف وكان الوضع صعب عشان الكاميرات واللاعيبة ميحسوش بحاجة ويأثر عليهم معنويا قولتله يقعد وأصر يقف على الخط".
"كل التفاصيل دي محدش كان يعرف عنها حاجة حتى اخواتي غير الدكتور محمد أبو العلا وطاقم الدكاترة في المستشفى.. معلش دي فضفضة من كتر الجحود والحروب اللي احنا شايفينها أنا وحسام بس مش هيقدروا يوقعونا ولا يوقفونا عشان مصر تستحق التضحية دي مننا".
