رد محمود جهاد، لاعب وسط الفريق الأول لكرة القدم بنادي الزمالك، على تصريحات معتمد جمال، المدير الفني للفريق الأبيض، بشأن إصابته خلال مواجهة بترول أسيوط، التي أقيمت مساء أمس، بعدما غادر الملعب في الدقيقة 38.
وكان معتمد جمال قد أوضح عقب المباراة أن محمود جهاد اشتكى من آلام في العضلة الضامة، مشيرًا إلى أن اللاعب يشعر بالخوف من أي إحساس بالألم ويطلب عدم استكمال المباراة.
محمود جهاد يوضح حقيقة إصابته
ونشر محمود جهاد بيانا عبر خاصية "القصص القصيرة" بحسابه الرسمي على موقع "إنستجرام"، أوضح خلاله موقفه من الإصابة، مشيرا إلى أنه لا يخشى المشاركة أو بذل الجهد مع الزمالك.
وقال لاعب الوسط: "بسم الله الرحمن الرحيم، حابب أوضح حاجة للناس، وخاصة جمهور الزمالك الكبير. أولًا، الإصابات دي نصيب من عند ربنا، وأنا دايمًا بشتغل مهما حصل، ومش زعلان ولا بتأثر، ومش لازم أطلع أقول أنا بعمل إيه كلام يخليني كويس، لأن ده الطبيعي وده شغلي".
وأضاف: "اللي حصل النهارده طبيعي يحصل بعد فترة غياب سنة كاملة، وأنا تمام، مفيش إصابة زي الأول ولا حاجة، كلها حاجات طبيعية تحصل، والحمد لله هفضل مكمل، وثقتي في ربنا أكبر من أي حاجة، ومهما يحصل هفضل برضه".
وتابع: "أنا مش بخاف على نفسي أو مكسل أدي للنادي الكبير اللي أنا أتشرف إني لابس التيشيرت بتاعه، بالعكس، ربنا وحده اللي عارف أنا بعمل إيه".
وأوضح جهاد أنه يتعامل بحذر مع الآلام بسبب الإصابات التي تعرض لها مؤخرا، قائلا: "ومش خايف خالص، بس ببقى حريص شوية، لأن أول مرة يحصلي إصابات كده. ثانيًا، الجهاز الفني والجهاز الطبي، الناس كلها محدش قصر معايا، والناس كلها بتساعدني بأقصى حاجة عندها".
واختتم لاعب الزمالك بيانه قائلا: "ثالثا وأخيرا، النقد الفني طبيعي وبيبقى مقبول وبيعلم الواحد، لكن التريقة والسف على حاجة بإيد ربنا دي تفاهة وجهل، لأن كل حاجة من عند ربنا. شكرًا، أنا حبيت أوضح لأني من أول ما لبست تيشيرت الزمالك عمري ما طلعت وضحت، لأني ما بحبش أتكلم في حاجة زي دي كتير".
